(kim ki fala kriol ka sabi, siti ku liti bas di kama di si mame)
Irans dudus nega polon,
ali elis e na ferferi,
e kuri nam di kobom
e djunta n'utru na iariari
tras di bambarans k' funguli
k' koitadesa pui i rotroti,
ma e mola boka pruntu pa nguli
te kilis nam pro k' potpoti;
e na rumpi bambarans, e na buli
kil padidas k' nbaria na fetfeti,
tok kabesa bida gos i totoli,
na geria ku e mantcha ki na nhatnhati.
Irans na kansa mame
k' foronta na kutkuti,
e na nganal ku ndale,
na sintidu di luplupi
tras di si fidju k' nhongoli,
k' bida i ual-uali
pabia di fomi k' na tchokoli
tok bariga gos kaskasi;
i na kansa fidju k' pes nomboli,
pabia di kansera k' ialali,
si sunhus tudu potcholi,
ma em bes di i girta, i na belbeli.
Irans na kansa pape
k' pega tesu na farfari
ku manduku di lambe
e limbil tok i tartari...
pape kansadu na kopoti,
tok kosta tudu na bulbuli,
pabia inxadas na fokoti,
kaba tchuba ka na ierieri;
pape ka na ianda, son djopoti,
i ka tene nim bianda pa sepsepi,
gos si udjus nam ki e na lokoti,
ma i ka osa nim saksaki.
Irans na kansa mininu de,
tok i medi dapil, i na nan-nan'i
pa um futuru mofinu, sim fe,
amanha na kaplil i na tchantchan'i;
mininu sta suma mangu ki konkonhi
k' sekura suta kaska tok i nornori,
si speransa k' munguti k' pui i pimpinhi.
Irans gasali kil si sunhus k' basbasi,
e fala i kingiti, e panhal el e fatfati,
tok kila iesali, nim i ka pudi n'unin'uni.
Ali mininu sim kankanha, nim kinkinhi,
gos na kintal di brankus ki na uar-uari.
23.09.03
